وتار

بۆچی ئەدەبی کلاسیک دەخوێنینەوە

                                                  ن: ئیتالۆ کالوینۆ

                                                                     و. ساماڵ

به پێناسەیەک ده‌ست پێده‌که‌ین:

١ـ به‌رهه‌می کلاسیک به‌و کتێبانه ده‌گوترێن که به گشتی له زمانی خه‌ڵکه‌وه نابیسترێ که بڵێن: ''خه‌ریکم ده‌یخوێنمه‌وه'' بگره‌ هه‌میشه ده‌ڵێن:''خه‌ریکم جارێکی‌تر ده‌یخوێنمه‌وه.''

ئه‌م بابه‌ته هیچ نه‌بێ له‌باره‌ی ئه‌و کەسانەوە که هۆگری کتێب‌ و کتێبخوێندنه‌وه‌ن، ڕاسته. به‌ڵام له‌باره‌ی گه‌نجانه‌وه‌، ئه‌و ته‌مه‌نه‌ی که‌ تێیدا پێوه‌ندی له‌گه‌ڵ دنیا و له‌گه‌ڵ به‌رهه‌مه‌ کلاسیکه‌کان وه‌کوو به‌شێک له‌ دنیا گرینگه‌، گرفتی ڕووبه‌ڕووبوونه‌وه‌که له‌وه‌دایه که یه‌که‌م ڕووبه‌ڕووبوونه‌وه‌یه.

له ڕاستیدا ئه‌م وشه‌ی ''جارێکی تر''ه که به‌دوای ''خوێندنه‌وه''دا دێ، ڕه‌نگه خۆنواندنی ڕیاکارانه‌ی ئه‌و که‌سانه بێ که پێیان عه‌یبه بڵێن، ئه‌و کتێبه به ناوبانگه‌یان نه‌خوێندۆته‌وه. بۆ دڵنیابوونی ئه‌و که‌سانه ته‌نیا ئاماژه به‌م خاڵه به‌سه؛ هه‌رچه‌ندی پانتای خوێندنه‌وه‌ی بەکه‌ڵکی که‌سێک به‌رینیش بێت، هه‌میشه ڕەنگە هێندێک کتێبی گرینگ‌ و بنه‌ڕه‌تی هه‌بن که ئه‌و که‌سه هێشتا نه‌یخوێندوونه‌ته‌وه

ادامه نوشته

شیعر

بناغه‌ 2

ساماڵ

به‌رده‌وامیی بناغه‌

هرووژمی    بان

ادامه نوشته

شیعر

بناغە 1

 ساماڵ

بناغە لەسەر بناغە       بناغەی بن بن

بناغەی بن             بناغەی وەکوو بن

ادامه نوشته

بۆ کاره‌ساتی ئاگرگرتنی قوتابخانه‌که‌ی شیناوێی پیرانشار

له‌گه‌ڵ ئه‌م سووتاوانه‌

سه‌ید عه‌لی ساڵحی

وه‌رگێڕ: ساماڵ

گڕگرتوو به‌ شیناوێدا
منیش له‌ سوێی "سه‌یران" و ئه‌ستێره‌دا مردووم...
سه‌ری ئێوه‌خۆش 
سه‌رقاڵانی تاریکایی!

چاویان لێ که‌ن..
ئه‌و فریشته‌ سووتاوانه‌
به‌گه‌شانه‌وه‌ی ئه‌نگوستی سووتاویان له‌به‌ر با
ئاماژه‌ به‌ ڕێگای ڕزگاربوونی دنیا ده‌که‌ن..
وشه‌کانی من له‌ شه‌رمی ئه‌و ته‌شه‌ره‌
گڕیان گرتووه‌!

چاویان لێ که‌ن
له‌وێ...ده‌ستێکی له‌رزۆکی منداڵانه‌
له‌سه‌ر ته‌خته‌ڕه‌شی به‌یانی نووسیویه‌تی:
نه‌وت، نان، سووتان
ژان، دنیا، قوتابخانه‌...

هه‌ڵده‌سووڕێم له‌ ئاوردا
ده‌ریا
       جوابم ناداته‌وه‌...

ئەدەبیاتی بنەماکان

ئەدەبیاتی بنەماکان

نووسه‌ر: ئۆکتاڤیۆ پاز

وه‌رگێڕ: م.ساماڵ ئه‌حمه‌دی

ئاخۆ شتێک بە ناوی ئەدەبیاتی ئیسپانی_ئەمریکی بوونی هەیە؟ لە کۆتایی سەدەی  ڕابردوودا دەگوترا کە ئەدەبی ئێمە پەلێکە لە درەختی ئیسپانیایی.

ئەگەر مەبەستمان تەنیا لە بارەی زمانەوە بوایە، قسەی لەمە ڕاستتر نەدەبوو.

ادامه نوشته

ته‌نیا وه‌ته‌نی نووسه‌ر، دووکانی کتێب‏فرۆشی‏یه‌.

                                                                                                                 ر. بۆلانیۆ

  زۆر ئێوارێ که‌ دێیه‌ ده‌رێ نازانی چ بکه‌ی؟ تێکه‌ڵ ئه‌و حه‌شاماته‌ی نێو شه‌قام ‌بی و هه‌ر له‌و سه‌ری نه‌خۆشخانه‌ی قه‌دیمه‌وه چاو له‌ مۆد و دووکانان ‌بڕی تا ده‌گه‌یه‌ چواڕێی ئه‌سکه‌نده‌ری و باس له‏ ئه‌وه‌ بکه‌ی کێ‌ ده‌وڵه‌مه‌ند بووه‌ و ئه‌وه‌ چۆن وای لێ هات و دیتنی مانتۆی ژنان و قژی سه‌ری گه‌وره‌کوڕان و بگه‌ڕێیه‌وه تا ئیسکیپی و چاو‏لێکردنی یه‌ک‏دوو ڕۆزنامه‌ی زه‌رد و جه‌دوه‌ل و ڕاگرتنی تاکسی‏یه‌ک و بێ‏تاقه‌تی. سه‌ر له‌ دووکانی یه‌ک‏دوو دۆست بده‌ی و گاڵته‌یه‌ک و کورته‌ هه‌واڵێکی یه‌کتر و بای‏بایه‌کی ئینگلیزی ودیسان بێ تاقه‌تی. خۆ بکه‌ی به‌ قاوه‌خانه‌دا و چایه‌‌کی پڕڕه‌نگ و بۆنی جگه‌ره‌ و قلیان و هه‌واڵی مردن و شایی و هه‌ڵگیرانی ژنان و حیزی پیاوان و حه‌شیش و شیشه‌ و هه‌میسان بێ‏تاقه‌تی. هێندێک که‌ل‏و‏په‌لی ماڵ بکڕی و چاو به‌  نێو دووکانان‏دا بگێڕی و قیمه‌تی شتی جوراوجۆر بپرسی و بڵێی چه‌ن گرانه‌ و شت بۆته‌ قه‌باعه‌ت و خودا خراپتری نه‌کا و تووره‌که‌یه‌ک به‌ده‌سته‌وه‌ به‌ره‌و ماڵێ و هه‌میسان بێ‏تاقه‌تی. ده‌کرێ ئێوارێ ئاوا ببێته‌ شه‌و. شه‌وێک پڕ له‌ بێده‌نگی و نیگای تلووزێن و هێندێک برێشکه‌ی سۆر و خه‌وێکی نزیک له‌ مردن.

  چه‌ن ساڵ له‌وه‌ پێش ده‌کرا ئێوارێ ئاوا نه‌بوا. له‌سه‌ر چوارڕێی شاره‌بانی، محه‌ممه‌دی ئه‌حمه‌دی- ساماڵی شاعیر- به‌ ئه‌وپه‌ڕی دڵ‏گه‌وره‌یی‏یه‌وه‌ کتێب‏فرۆشی "ڕۆژ"ی هه‌بوو. ئه‌و شوێنه‌ی جه‌ماوه‌ری به‌ نێو مۆدێڕنی شار، بێ ئه‌وه‌ی بزانن ئاواتی ده‌یان که‌س له‌و دووکانه‌‏دا خه‌ریکی سه‌مان، به‌ به‌ری‏دا تێده‌په‌ڕین. دووکانێک پڕ له‌ نووسین و خوێندنه‌وه‌ و چاویلکه‌ له‌چاوانی که‌م‏پاره‌ی کتێب‏خوێنی پڕئاره‌زووی کڕینی کتێب. له‌ خه‌یاڵی من‏دا بیری مسته‌فای کوڕه‌چاکه‌ی برای، له‌ دووکه‌ڵی جگه‌ری پێش چاوه‌چکۆله‌کانیه‌وه‌ هه‌ر دیاره‌: زۆری دڵ پێوه‌ بوو له‌ جیات ئه‌و هه‌موو قسه‌ی نێو دووکان، وه‌ک دووکانێکی کۆتاڵفرۆش پووڵ و پاره‌ له‌ ده‌خڵیان‏دا هاتبا و ڕۆیبا. بۆیه‌ دایمه‌ بیری له‌وه‌ ده‌کرده‌وه‌:"کشت‏و‏کاڵ چاکتره‌ له‌ کتێب‏فرۆشتن." محه‌ممه‌د ده‌یزانی ده‌خڵی دووکان به‌ ئاوات پڕ نابێ و دووکه‌ڵی جگه‌ره‌ی ئه‌و بیری له‌و ڕۆژانه‌ ده‌کرده‌وه‌ که‌ بژیوی ژیان کتێب‏فرۆشتنی پێ ته‌رک ده‌کات.

  ئێوارانی ئه‌و ده‌م که‌ ده‌چوویه‌ ده‌رێ ده‌تزانی جێگایه‌ک هه‌یه‌ که‌ بچی و بێ‏تاقه‌ت نه‌بی. جێگایه‌ک هه‌یه‌ که‌ ده‌روونت سوکنایی پێ بێ. نێو کتێب و کتێب‏خوێن و شاعیر و نووسه‌ر و دۆسته‌کانیان. دووکانێک پڕ له‌ کاغه‌ز و کۆپی و کتێب و پێنووس و ده‌فته‌ری یادگاری و خه‌یاڵاتی جۆراوجۆر. بێ‏تاقه‌ت نه‌ده‌بووین له‌وێ. قسه‌ ده‌هات و ده‌چوو. ون ده‌بووی له‌ مژی جگه‌ره‌ و بۆنی چایی جارجاره‌ و ده‌بیندرایه‌وه‌. محه‌ممه‌د قه‌ت نێوچاوان گرژ نه‌ده‌بوو. گۆڤاره‌ کوردی‏یه‌کان له‌وێ ده‌بیندران. زۆر گۆڤاری تایبه‌تیش ده‌هات که‌ پێ‏نیشان هی وه‌ک من نه‌ده‌درا به‌ڵام هه‌واڵه‌کانیمان پێ‏ده‌گه‌یشت. تامه‌زرۆ بووین بزانین چیمان له‌ کوێ‏دا بڵاو بۆته‌وه‌. له‌وه‌ش‏دا هه‌میشه‌ ده‌سته‌یه‌ک سه‌رتر بوون. که‌متریان ده‌نووسی و زۆرتریان لێ چاپ ده‌بوو. نووسراوه‌ی ئه‌م‏دیو و‏ئه‌ودیوی کوردی ده‌هاته‌ که‌شی کتێب‏فرۆشی ڕۆژه‌وه‌. زۆرجار میوانی ئه‌م‏به‌رئه‌وبه‌رمان له‌وێ ده‌دی که‌ یه‌کی وه‌ک من له‌و ساڵانه‌وه‌ ئیدی نه‌یدیون. زۆرجار هێنده‌ باس له‌ که‌سایه‌تی هێندێک که‌س ده‌کرا ده‌تکوت هه‌میشه‌ له‌وێن: هاشم سراج و شێرزاد و ئه‌نوه‌ر مه‌سیفی و کاک حوسێن و عه‌زیز و سه‌یدی هه‌واڵی و خالق و ئه‌مین و بێگه‌رد و فه‌رهاد شاکه‌ڵی و ره‌زازی و هێمن و به‌ختیار و فه‌رهاد پیرباڵ و عه‌تای نه‌هایی و ساڵحی سووزه‌نی و فه‌تاح‏خان و کاک ناسر و وه‌فای شاعیر و په‌شێو و سه‌یدجه‌عفه‌ر و کاک سمایلی کتێب‏دۆست و شێرکۆ و ڕه‌فیق سابیر و عه‌لی محه‌مه‌دزاده‌ی بێده‌نگ و یۆنس و ئازادی شاعیر و قادر و خه‌ونه‌کانی خودا و گروپی خۆر و ئه‌نجوومه‌نیه‌کان و هه‌واڵانی ئه‌نجوومه‌ن و ڕه‌سووڵ و فه‌وزێی شاعیر و ڕێبینی کوڕیان و خالق و کامیل و قادر و له‌تیف هه‌ڵمه‌ت و سه‌لاحی مه‌نگوڕ و لاوانی وه‌ک ئه‌مجه‌د و خه‌ونه‌ دزراوه‌کانی محه‌مه‌دی ڕه‌مه‌زانی و ئاواته‌سیاسی‏یه‌کانی جه‌واد و ده‌یانی که‌سایه‌تی دیکه‌ی نێو کتێبه‌کان هه‌واڵی ئه‌وده‌ممن. له‌ کتێبخانه‌ی ڕۆژ هه‌میشه‌ ته‌م‏و‏مژی کار و کار و کار بوو. هه‌موو کارمان ده‌کرد. ده‌مان‏نووسی و ده‌مان‏خوێنده‌وه.‌ بۆیه‌ له‌و ئێوارانه‌‏دا بێ تاقه‌ت نه‌ده‌بووین. شتێک‏مان پێبوو که‌ باسی بکه‌ین. لێواولێوی ئه‌ده‌بیات ده‌بووین له‌ دووکان و به‌ردووکانی محه‌ممه‌د و وامان لێده‌هات که‌ شه‌وانه‌ بێ‏نووسین خه‌ومان لێ‏نه‌ده‌که‌وت. دووکانی محه‌ممه‌د کانگای حه‌سانه‌وه‌ی ڕووح بوو. زۆر شه‌ڕی لێ ساز ده‌بوو و زۆر دیداری ئاشتی‏شی لێ خۆش ده‌بوو؛ گله‌یی له‌سه‌ر گله‌یی و باس و قسانی سه‌یر و سه‌مه‌ره‌. به‌ڵام هه‌مووی له‌ به‌ر ئه‌ده‌بیات و له تاوی نووسین و خوێندنه‌وه‌. هه‌رچه‌ند ئه‌و کات محه‌ممه‌د و ده‌یانی دیکه‌ی وه‌ک من دڵ‏ته‌نگی نه‌بوونی پاره‌ بووین به‌ڵام بێ تاقه‌ت نه‌ده‌بووین. ئه‌گه‌ر سرته‌یه‌کمان بووبا ده‌هاتینه‌ به‌ر درگا یان به‌ر ویترینه‌که‌ی و یان له‌قه‌راغ قاناوی شه‌قام ده‌مان کرده‌ جه‌فه‌نگ.  ته‌واوی ئه‌و ئێوارانه‌ چاومان هه‌ر له‌ کتێب بوو. تێکه‌ڵ کتێب ده‌بووین. زۆر شاکار نه‌ناسراومان به‌ یارمه‌تی یه‌کتر خوێنده‌وه‌. زۆر قسه‌ی ئاشقانه‌مان له‌سه‌ر کتێب له‌وێ گوێ لێ‏بوو. محه‌ممه‌د زۆرجار که‌ له‌و جه‌ماعه‌ته‌ ماندوو ده‌بوو بۆخۆی به‌ بیانووی جگه‌ره‌وه‌ ده‌هاته‌ به‌ر دووکان و له‌ بیری ئه‌وه‌دا "که‌ باشه‌ بۆ فڵانی و فڵانیش قه‌رز ناده‌نه‌و؟"‌ ئاش به‌تالی ده‌کرد. مسته‌فا که‌م وا هه‌بوو سه‌نگه‌ری دووکان به‌ر دات و تێکه‌ڵمان بێ به‌ڵام ئه‌ویش به‌ دزییه‌وه‌ و به‌شی ته‌نیایی خۆی باشی ده‌خوێنده‌وه‌؛ وه‌ک له‌بیرم بێ ڕۆمانی "ته‌ڕڵان"ی قه‌وامی پێش زۆرمان خوێنده‌وه‌. ناعیلاج بوو. ئه‌وه‌ی هاتبا ئه‌و دووکانه‌وه‌ له‌ نه‌خۆشی خوێندنه‌وه‌ نیزیک ده‌بۆوه‌. مسته‌فا ورده‌ورده‌ کتیبی باشتر ده‌ناسی و چاکتریشی ده‌فرۆشت. بۆ وێنه‌ ئه‌وده‌م توانی پڕۆست به‌ من بفرۆشێ و ئه‌گه‌ر ئه‌و نه‌بووا من قه‌ت له‌ کاتی سه‌ربازی ڕفێقێکی وه‌ک پڕۆست‏م نه‌ده‌بوو.

ئیستا دیسان ئێواره‌یه‌‌ و کتێب‏فرۆشی رۆژ ساڵه‌هایه‌ ته‌نانه‌ت ناویشی نه‌ماوه‌. من بێده‌نگ به‌لای چوارڕێی شاره‌بانی‏دا خوار ده‌بمه‌وه‌ به‌ره‌و ماڵێ و هه‌میسان بێ‏تاقه‌تی و بێ‏تاقه‌تی...

سەرچاوە وێبلاگی خەونباز

شێعر

نا...

نا.. په‌یژه‌ی باران

ده‌ماری زه‌مان

 

شه‌قام جمه‌ی دێ له‌ ته‌نیایی

به‌ هێڵه‌گی ته‌ڕی نیگادا

  ده‌چۆڕێ  

نه‌رم..نه‌رم.. نا

ده‌چزێ به‌ قیلی به‌رده‌م‌دا

 

هیچ‌شتێک ناجووڵێ

 

ڕێگا.. سه‌رانسه‌ر ده‌ماری مه‌ودا

نا.. سه‌رانسه‌ری ڕێگا...

شێعر

خوازه‌ی یه‌که‌م

له‌ سوێی هه‌ناره‌کانی تۆ

پیاوێکم له‌ ئاو

              هه‌ر دڵۆپه‌م دڵۆپێکی تر

 

خه‌ریکه‌ له‌ش  /  به‌ ئاره‌زوویه‌کی بێ حه‌یاوه‌

خه‌ریکه‌ تۆ  / ده‌تکێم له‌ حه‌یا

              

                خه‌ریکه‌ شه‌پۆلانم له‌ پێست

                 ده‌لرفێ به‌ سه‌رانسه‌رتدا

 

خه‌ریکه‌ نمێک فێنکایی مه‌مکت

له‌‌ خوازه‌ی یه‌که‌م خه‌ونی مرۆڤه‌وه‌

                                     ده‌گوورێم

شێعر

5-‌ی ئێواره‌ قه‌رار بوو

 

5-‌ی ئێواره‌ قه‌رار بوو

نه‌ لۆرکا

نه‌ گایه‌کی یاغی .. تا هۆڕه‌ی مردن

 

5-‌ی ئێواره‌ قه‌رار بوو

ڕۆژێک..

نه‌ ئه‌و ڕۆژه‌ی که‌ ئێواران ئاوا ده‌بێ

 

5-‌ی ئێواره‌ قه‌رار بوو

هه‌ڵکردنی شنه‌ی لێو

شه‌کانه‌وه‌ی گه‌نمی گۆنا

چۆڕانه‌وه‌ی هۆشی مرۆڤ

به‌ ئاره‌قه‌ی شله‌تینی پێست‌دا

 

5-‌ی ئێواره‌ قه‌رار بوو

چه‌مینه‌وه‌ی پشت.. سوژده‌ی کێو

نێڵه‌ی ئه‌فسانه‌ی وه‌جاخ

تا..

کرانه‌وه‌ی

           کۆشکی به‌یداخ سوور‌ی په‌ری...

غه‌زه‌لی غه‌زه‌له‌کانی سوله‌یمان

هێندێک له‌ توێژه‌ران له‌هۆکاری ئه‌وه‌یدا که‌ بۆچی غه‌زه‌لی غه‌زه‌له‌کانی سوله‌یمان به‌واتای عاشقانه‌وه‌ له‌ توێی کتێبی ته‌وڕاتدا وه‌ک ده‌قی پیرۆز(موقه‌ده‌س) هاتوون؛ ده‌لێن: ئه‌و غه‌زه‌لانه‌ مه‌دحی شه‌خینه‌ن که‌ له‌ عه‌ڕه‌بیدا بۆته‌ سه‌کینه‌ و لایه‌نی مێوینه‌ی یه‌هوه‌یه‌.

له‌ فه‌رهه‌نگی سیمبوله‌کاندا لاپه‌ڕه‌ 293 له‌ باره‌ی شه‌خینه‌وه‌ نووسراوه‌: له‌ ئایینه‌ نهێنی و عیڕفانییه‌کانی جووله‌که‌دا لایه‌نی مێوینه‌ی خودایه‌ و هاوتای زاراوه‌ی ئانیمای یوونگه‌.  

                                            (داستان یک روح: دکتر سیروس شمیسا لاپه‌ڕه‌ 60)

                    غه‌زه‌لی غه‌زه‌له‌کانی سوله‌یمان

                                    محه‌مه‌د ئه‌حمه‌دی

سروودی یه‌که‌م

خۆزگه‌ به‌ ماچی لێوانیم

                             ڕامووسێ

 

خواردنه‌وه‌ی عه‌شقی تۆ

                         خۆش تره‌ له‌ شه‌ڕاب

گیانی تۆ

بۆنخۆش ترینی یه‌که‌م‌ عه‌ترانه‌

ناوی تۆ

 به‌رامه‌ی خۆش ترین بۆنی پژاوه‌

                         بۆیه‌ دڵ له‌ کیژان ده‌ڕفێنی

 

ئێستا بانگم بکه‌ ئه‌ی میری خۆم!

تاکوو به‌ هه‌ڵه‌داو

به‌ هه‌نگاوی بۆنخۆشتدا سه‌رهه‌ڵگرم

بێمه‌ نێو ماڵه‌که‌ته‌وه‌

که‌ بگه‌ڕێی له‌ دڵمدا شاد و

                         له‌ سه‌رمدا خۆش

ئه‌وه‌ میری من

بردمیه‌ نێو کونجی شاراوه‌ی خۆی

ڕه‌نگ هه‌ڵپڕووسکاو

ده‌ست و پێ نه‌ماو

له‌ نێو په‌رده‌ی میری دڵاندا ده‌پشکوێم

ئای که‌ خۆشه‌ خۆشویستنی تۆ ئازیزم!

له‌ هه‌رچی خواردنه‌وه‌یه‌ زیاتر

                       پێت سه‌رخۆشم

تۆ به‌ ڕاستینه‌ی عه‌شقه‌وه‌ دڵبه‌ری

‌

 

گه‌وره‌کچانی ئۆڕشه‌لیم!

ئێوه‌ و مێئاسکی نواڵان!

ژان مه‌ده‌نه‌ به‌ردڵم!

سوکنایی گیانم له‌ خه‌وێکی هێوردایه‌

هه‌را مه‌که‌ن 

             با تێرخه‌و بێ

هه‌یاران!

ئه‌وه‌ گۆرانی یاره‌ ده‌یبیستم‌

گوێم له‌ ترپه‌ی پێی دڵداره‌

                     له‌ باغی کچێنیمڕا

لۆمه‌م مه‌که‌ن!

گه‌رچی قولێکی تاوگه‌سته‌م

                           به‌ڵام جوانم

ملبه‌ندم ئه‌ستێره‌چنه‌ و

یارم کوڕێکی شلکه‌

خۆشی ده‌وێم

گازی دڵی من ده‌کا

 

لۆمه‌م مه‌که‌ن کچانی ئۆڕشه‌لیم!

برالانم لێم زویربوون

له‌به‌ر ئه‌و سووره‌تاوه‌دا

کردیانمه‌ باغه‌وانی ڕه‌زان

به‌ڵام هه‌ی داخی گران!

نه‌پڕژامه‌ سه‌ر ڕه‌زی باڵام

 

 

کوڕه‌شوانی هۆزه‌که‌م

کردمیه‌ ڕه‌زی به‌رهه‌تاو

ئه‌وه‌ ئیستا

            دڵم ته‌نگه‌ و

            ڕه‌زی به‌ژنم بێ باغه‌وان

ئاخ گراوه‌ بۆنخۆشه‌که‌م!

نیوه‌ڕۆ له‌ کوێ نوستی؟

مێئاسکه‌ کێویه‌کانت له‌کوێ مۆڵدا و

له‌ کوێ خه‌وتی؟

تاکه‌ی له‌‌ دوای تۆ

په‌رچه‌ڕانی هاوڕێکانت بگه‌ڕێم؟

بۆ لێم ونی؟

له‌ کێهه‌ ڕه‌زدایه‌ ڕانه‌که‌ت؟

 

خێرابه‌ نازه‌نینه‌که‌م!

ئه‌ی له‌به‌ردڵان تر کچی جووله‌کان!

به‌ڕاستی نابه‌ڵه‌دی ڕێگای؟

سه‌رهه‌ڵبڕه‌

شوێن ڕه‌وی مێگه‌لان که‌وه‌

به‌رغه‌له‌‌ت ڕاده‌ بۆ له‌وه‌ڕگا

وه‌ره‌ بۆ لام!

ئه‌ی جوان تر له‌ ماینه‌کانی که‌ژاوه‌ی فیرعه‌ون!

بسکت جوانه‌ وه‌ک بڕکه‌ی ڕه‌زان

گه‌ردنت جوان تر به‌ هێشووی ماچه‌وه‌

وه‌ره‌ ئازیز!

ئه‌م هه‌واره‌ پڕکه‌ له‌ چریکه‌ی ئه‌وین

با ده‌سه‌ڵاتی بۆنی تۆ

                    بپژێ به‌ هه‌رێمی گیانمدا

کۆتره‌باریکه‌ی سه‌ر‌ئاسۆی یاڵان!

به‌ گمه‌ی تۆ ده‌پشکوێم

له‌چاوتدا...ئیشتیای ئاسمان ده‌خۆمه‌وه‌

وه‌ره‌ بۆلام!

گواره‌ی زێڕی

په‌ره‌نگ زێوت ده‌که‌مه‌ دیاری

 

دلداره‌که‌م

له‌سه‌ر جێ وبانه‌که‌ی خۆی

                         میوانی عه‌شقی من ده‌بێ

سه‌ری خۆشه‌ و

مێگه‌له‌ماچ له‌ گوڵزارم ده‌چه‌رێنێ

ئه‌و جوانه‌ وه‌ک گوڵی باغه‌کانی به‌رکانی"جوده‌ی"

بۆنخۆشه‌ وه‌ک بنێشتی داره‌به‌ن

وه‌ک قوتووی عه‌تار.. به‌نێو مه‌مکۆڵانمدا ده‌پژێ

وه‌ک ماندووی هه‌رده‌پێو له‌ ئامێزمدا ده‌نوێ

بۆنی گوڵی خه‌نه‌ی لێدێ

 

تۆ چه‌ند جوانی یاری خۆم!

                          چه‌نده‌ جوانی!

چاوه‌کانت دووکۆترن

له‌ ترپه‌ی دڵی مندا ده‌گمێنن

له‌ هه‌راسانی سه‌رمدا

                       ته‌قڵه‌ ده‌که‌ن

ئه‌ی له‌به‌ردڵان میری من!

ئه‌وه‌ چیمه‌ن ده‌بێته‌ جێ وبانی شه‌وی په‌رده‌مان

ئه‌وه‌ سنه‌وبه‌ر ده‌بێته‌ کۆڵه‌که‌ و

سه‌وڵیش هه‌ڵاشی ماڵه‌که‌مان

وه‌ره‌ یارم!

ئه‌و کاتانه‌ی که‌ تاو هه‌ڵدێ

ئه‌و کاتانه‌ش که‌ ئاواده‌بێ هه‌تاو